ఈ ఉదయం Sri Kanth K

..............
వానకి ముందు మబ్బులు కమ్ముకుని
బలమైన గాలి వీచి రహదారి పొడుగూతా
కొట్టుకుపోతుంది కదా
తెరలు తెరలుగా మట్టి

అక్కడక్కడా పడి ఉన్న కాగితాలని
దిశ లేకుండా తనతో లాక్కెడుతూ
తిప్పితిప్పి ఆకాశంలోకి విసిరివేస్తూ

మరి ఇవాళ ఉదయం
దారీ తెన్నూ లేకుండా
కొట్టుకుపోయింది నా శరీరం, హృదయం
నిన్ను తలచుకుని -

అనుకున్నాను ఇన్నాళ్ళూ
వాన రావడం ఆహ్లాదమే
అని కానీ - ధూళి రేగి, కళ్ళు చెదిరి
కమ్ముకున్న మబ్బులు
కళ్ళలోనే కురుస్తాయని 

రాసుకున్న కాగితం చిరిగిపోయి
అక్షరాలు చెరిగిపోయి
నీళ్లపై తేలిపోతాయని
ఇక నీకు చెప్పేదెవరు?

మబ్బెందుకొచ్చినాదో - నంద కిషోర్

మబ్బెందుకొచ్చినాదో-మొగలుకూ
సిగ్గెందుకొచ్చినాదో
పువ్వెందుకిచ్చుకుందో-కొమ్మదీ 
మనసెంత మెత్తగుందో

జానపదమూవోలె జారేటి జడివాన
కునుకురాగంలోన సినుకుసినుకూ నేసి
సిత్రంగ సిత్రంగ ముడులేసి గడులేసి
ముద్దులా రంగద్ది ముఖమునే దాచేటి

తెరలెట్ల అల్లినాదో-ఓ పిల్ల
తెమ్మెరట్లాడినాదో
మసకెట్ల కమ్ముకుందో-సూదంటు
సీకటెటులాగినాదో

|మబ్బెందుకొచ్చినాదో-మొగలుకూ
సిగ్గెందుకొచ్చినాదో|

తంగేడుమోదుగులపసుపుకుంకుంబెట్టి
వరదగూడూగట్టి సిగ్గంత ఎగ్గొట్టి
వాన అచ్చింతల్ని దులుపుకుంటూతుళ్ళె
కానుగానీడల్లో కన్నుకన్నూకలిపి

మనువెట్లజేసినాదో -ఓ పిల్ల
మనసెట్లదోచినాదో
వయసెట్లదెలిపినాదో-వంతేసి
వలపెట్లపంచినాదో

|మబ్బెందుకొచ్చినాదో-మొగలుకూ
సిగ్గెందుకొచ్చినాదో |

ఇప్పసెట్లాసిగురుమేసితిన్నామేక
దూరంగదూరంగమందకేదూరంగ
మచ్చలదుప్పోలె ఉర్కిఉర్కీపోయి
గుట్టమీదికిఎక్కి తప్పిపోయె ఆట

మనకెట్ల నేర్పినాదో-ఓ పిల్ల
మత్తెట్లదించినాదో
ఎండెంత ఎచ్చగుందో-ఎండేటి
ఘడియెంత మంచిగుందో

|మబ్బెందుకొచ్చినాదో-మొగలుకూ
సిగ్గెందుకొచ్చినాదో |

సూరుకొసలామీద సుడిగాలిగారేగి
వాసాలగాలించి నిట్టాడనదిరించి
తాటికమ్మలన్నీ తానమాడేవాన
గుడిసెలో కూసున్న గుండెలో నిదరోగ

ఇళ్ళెంత ఉరిసినాదో-ఓ పిల్ల
ఒళ్ళెంత వణికినాదో
సలిఎంతబుట్టినాదో-సంజేటి
పొత్తిళ్ళుజీరినాదో

|మబ్బెందుకొచ్చినాదో-మొగలుకూ
సిగ్గెందుకొచ్చినాదో|

నల్లినారిస్తర్లు నలుచెరగులానిండి
దుంపిడీయేర్లకు దూపమొత్తందీరి
సంపెంగపారంగ జంపన్నలేవంగ
నర్రెంగసెట్లల్ల నరుడు నడయాడంగ

అడవెంతపొంగినాదో-ఓ పిల్ల
అందమెట్లొదిగినాదో
అలుగెట్ల దుంకినాదో-సిన్నారి
పరకేమి పాడినాదో

|మబ్బెందుకొచ్చినాదో-మొగలుకూ
సిగ్గెందుకొచ్చినాదో|

నలనల్లరేగళ్ళ నల్లానివాగయ్యి
ఎర్రెర్రసెలకల్ల ఎర్రాని ఏరయ్యి
పొలమూగట్టూమొదలు తుమ్మతోపూకాడ
సినుకుపూలసూసి తుమ్మెదలుకదలంగ

వరదెంతవచ్చినాదో-ఓ పిల్ల
వగలెన్నిసూపినాదో
సాలెంత నవ్వుకుందో-జోకొట్టి
మొలకనెట్లుత్తుకుందో

|మబ్బెందుకొచ్చినాదో-మొగలుకూ
సిగ్గెందుకొచ్చినాదో|

రావీ ఆకుమీది రతనమంటీ సినుకు
తీరొక్కతీగల్ల నీలాలతుంపరై
పత్తిసేలపైన పగడాలవానయ్యి
వరినారు వంపులో సొంపులో కెంపులై

పాలసెట్టిక్కినాదో-ఓ పిల్ల
పాలబొట్టయ్యినాదో
పల్లెపై మెరిసినాదో-మాగాణి
మట్టిలో మురిసినాదో

|మబ్బెందుకొచ్చినాదో-మొగలుకూ
సిగ్గెందుకొచ్చినాదో|

మత్యాల వానముడి

విప్పుకుంటూ By Nanda Kishore

గ్రీష్మపరితప్తమదృశ్యమగునో పశుల
దాహార్తులేదీర్చు వానపడునో

తన్మయత్వమె రాగ తరుఛ్ఛాయల నేల
గరిక పులకింతలై సిగ్గుపడునో

మోహపెట్టే మధురబాసలే నదిలోన
ఉరకలేసే నీటి తరగలగునో

మత్యాలవానముడి
విప్పుకుంటూ

ప్రియసఖీ!
ముగ్ధత్వమందుకోపో.

4.3.2014