వర్షించే ఆకాశం

అరుణ నారద భట్ల

ఆకాశం ఏడుస్తుంది
తాపం బాధించిన చోటల్లా భూమికై పరితపిస్తూ
మబ్బుదొంతరలను పత్తిలావిచ్చుతూ
ధరిత్రిని ఓదార్చే దిశలో
తానూఒకింత సాయంచేస్తుంది
ఇలానీరుకారుస్తూ

కాలుష్యపుపొరలను కాలరాస్తూ
భూమిపై ప్రేమను వర్షంలా వ్యక్తపరుస్తుంది
తనచుట్టూ ఆవహించిన గాఢమైన వాయువుల కన్నుగప్పి
పీల్చేస్తున్న ఊపిరిని తిరిగి తెస్తూ
నీటి ధారలై కన్నీటిధారలై..

నింబస్ మేఘాలను బద్దలుచేస్తూ
పరుగులెడుతూ వచ్చి పలకరిస్తుంది
అడ్దుగోడలా ఉన్న దూదిమబ్బులను
ఉరుము మెరుపులతో కోపగించి
పుడమిని అల్లుకుని నేనున్నానంటూ
చిట్టిచిట్టి చినుకుల మమతల వర్షం కురిపిస్తుంది
నింగితల్లీ నేలబిడ్డనుపలకరిస్తూ
అమృత వర్షం కురిపిస్తుంది

-----------------------------------31.07.2013