ఈ ఉదయం Sri Kanth K

..............
వానకి ముందు మబ్బులు కమ్ముకుని
బలమైన గాలి వీచి రహదారి పొడుగూతా
కొట్టుకుపోతుంది కదా
తెరలు తెరలుగా మట్టి

అక్కడక్కడా పడి ఉన్న కాగితాలని
దిశ లేకుండా తనతో లాక్కెడుతూ
తిప్పితిప్పి ఆకాశంలోకి విసిరివేస్తూ

మరి ఇవాళ ఉదయం
దారీ తెన్నూ లేకుండా
కొట్టుకుపోయింది నా శరీరం, హృదయం
నిన్ను తలచుకుని -

అనుకున్నాను ఇన్నాళ్ళూ
వాన రావడం ఆహ్లాదమే
అని కానీ - ధూళి రేగి, కళ్ళు చెదిరి
కమ్ముకున్న మబ్బులు
కళ్ళలోనే కురుస్తాయని 

రాసుకున్న కాగితం చిరిగిపోయి
అక్షరాలు చెరిగిపోయి
నీళ్లపై తేలిపోతాయని
ఇక నీకు చెప్పేదెవరు?